مدونتى

الجزء الثالث 🎬

و بعد مكنت ميح فى البرمجة و مستوى الضعف الى كنت فيه خاصة ان كان معايا شباب عتاولة فى السكشن و مستواى جنبهم كان لا يذكر, بعد ما بدأ مستواى يتحسن شوية والدنيا بدأت توضح تدريجيا فيما بعد هوب قابل يعم امتحانات الميدترم و الواحد ابيض بفته فى معظم المواد و لكن كان هدفى ان اضبط فى امتحان البرمجة بالذات و تشاء الظروف و تأتى الرياح بما لا تشتهى السفن ولبست فى امتحان السى بلس بلس و لبست كذا موقف وحش فى السكشن لكن كنت بقول الغبى الى مش بيتعلم من اخطأه وكنت بحمد ربنا انه بيحطنى فى الظروف دى علشان ألحق اعيد ترتيب نفسى من جديد وفعلا رجعت ذاكرت برمجه تانى و بدأت اجيب كتب فيها امثلة و حلها بكذا طريقة و افهم كل طريقة شغالة ازاى كويس والحمد لله جابت نتيجة كويسة جدا معايا و واحده واحده بدأت أخد وضعى فى السكشن و بدأت أشرح لزمايلى برمجة وبدأت اتفاعل على الجروب بتاع الدفعة مع أى واحد يحط مشكلة و أحاول أساعده فى حلها و بعدين جيت امتحانات الترم الاول و امتحنت و جبت تقدير كويس فى البرمجة هى دى بصراحة الى كانت فارقة معايا, و من هنا بدأت فترة الازدهار  بعد ما اشتريت اللاب توب بتاعى و كنت عامل زى الجعان تكنولوجيا و وصلت نت و ابحث و أسال الى اكبر منى و يرشدونى و من هنا بدأت اشبع فضولى تجاه المجال بتاعنا فى فترة اجازة نص السنة و  طول الترم التانى و اهملت المواد الدراسية خالص و الى إكتسبته كان كالتالى:-

• اتعلمت فوتوشوب و بدأت اصمم صور لنفسى و لزمايلى . 

• اتعلمت html , css .

• اتعلمت اساسيات الجافا .

• دوست شويه فى مجال web design .

• قرأت كويس جدأ عن جميع مجالات الكمبيوتر.

• قرأت كتب بتشرح كل أداه تكنولوجيا شغالة ازاى .

• بقييت محترف تسطيب ويندوز هههههههههه .

• حضرت Events و Sessions كتير و بقيت متجاوب الى حد ما .

كل دا كان جانب مشرق فى حياتى و تعليمى و بتمنى ان مستوى التحصيل بتاعى دلوقتى يرجع زى مستوى الفترة دى,  لكن كل دا أثر علي مستواى الاكاديمى بالسلب لانى اهملت الدراسة جدا و ربنا ستر و عديت فيه فى سنة أولى بالحب, من هنا حابب انصح زمايلى الى فى سنة أولى شويه نصائح تفيدهم فى انهم يبنوا نفسهم فى سنة اولى ازاى لان انا بسيمها مرحلة البناء التكنولوجى 

• خليك فضولى و حاول تشبع فضولك دا من اى مصدر سواء اشخاص اكبر منك او اى طريقة تانية .

• إوعى تهمل الدراسة الاكاديمية حاول تظبط وقتك بينها و بين self study .

• انت مش هتشتغل بشهادة الكلية ابدا شوف و اتعلم تكنولوجى جديده و مطلوبة فى السوق دا مستواك الحقيقى و مصدر رزقك مش الشهادة خالص .

• اياك تكون خجول او متكبر من انك تسأل حد فى حاجه انت مش عارفها .

• اوعى تخرج من سنة أولى متعرفش يعنى ايه برمجة .

• متكتفيش برمجيا بالحاجة الى انت بتحصلها من الكلية ابحث على اتعلم . 

• البرمجة كلها مبنية على بعضها فلو تعبت و فهمت أساسيات كويس فى اولى هتستريح جدا بعد كدا .

• إحضر Events و Sessions كتير و حاول تستفيد منها لانها بتطورك و تعرفك التكنولوجى الجديدة .

• حاول تصاحب شخص أكبر منك و تستفيد منه .

• حاول تنضم لنشاط أسرى محترم و ساعد غيرك ,انا بندم انى مدخلتشن نشاط من سنة أولى .

• صاحب شباب يكونوا كويسين وحاول تبعد عن الامثلة الهدامة .

 الجزء الثانى 🎬

بعد الاحباط و خيبة الأمل الى انا بقيت فيها من حلمى الى مقدرتش احققه و من الكلية الى انا هدخلها و مش عارف اى حاجه عنها و داخل فيها زى ما المثل الشعبى بيقول "بيشترى سمك فى ميه" فقولت ما باليد حيله هدخل زى ما التنسيق محددلى و موضوع التنسيق دا من أسباب تخلف التعليم فى بلدنا لانه بيفرض على الطلبة انهم يتعملوا حاجات هما مش حابينها فبالتالى بيقتل الابداع الى ممكن يحققه فى الحاجه الى بيحبها, ما علينا دى سياسة دولة فاشلة ملناش دعوة بيها , ندخل فى المفيد رحت قدمت ورقى فى الكلية و الجو تمام و  فى الفترة دى علشان اطلع نفسى من الغم الى كنت فيه و المستقبل الى بقى زى السراب شغلت نفسى بالرياضة و بقيت مواظب على الجيم و كنت مهتم بجسمى شويه لانى كنت رفيع جدا هههههه, المهم الدراسة بدأت و رحت الكلية و حضرت محاضرتين تلاتة بالكتير و لقيت العباقرة الى بيشرحوا فنفسى اتسدت أكتر و قولت مش رايح تانى و فعلا قعدت يجى أسبوعين مرحتش الكلية , وبعدين بالصدفة واحد زميلى اكبر منى و فى هندسةمعيا فى الجيم بنتكلم فى الكليات و الكلام ده لقيته بيقولى يا ابنى دا كليتك احسن من هندسة و مستقبلها حلو و انت بتبقى مهندس برده و قالى فى واحد زميلى معاكوا هناك و انا هكلمه و يعرفك الدنيا ماشية ازاى و هيفدك قالى بس تروح الكلية, قولته ماشى و قابلت الراجل فى الكلية فى سنه أولى و بجد كان شخص جدع و عرفنى شويه حاجات فادتنى لحد دلوقتى .بس انا كنت بتحرج اتكلم معاه لانه كان معدى معدى بمعنى الكلمة و معظم كلامه معايا مكنتش بفهمه لانه كان كلام تقنى زياده عن اللزووم "فى مره قالى هيديك برنامج و تسطبه عندك و تكتب عليه الاكواد ساعتها اقسم بالله انا مكنت اعرف يعنى ايه تسطب برنامج و ثانيا انا مكنش عندى كمبيوتر اساسا و احرجنى يومها و بقيت محرج جدا و مكسوف من نفسى " لكن انا من ساعتها قولت هو انا ليه مقصر فى حق نفسى قوى كده و الشخص دا احسن منى فى ايه او مميز عنى فى ايه و كانت حجتى ان الكلية دى مش عاوزها و مش حابب المجال دا اساسا, قمت جايب ورقه وكاتب عليها جملة "الواقع عكس الاحلام لازم أصحى من الحلم لازم أثبت نفسى" والجملة دى انا استوعبتها و علقت فى دماغى و من هنا بدأت العزيمة تجينى انى لازم أتأقلم على الوضع الحالى و ابقى كويس فيه بدأت اقرا عن الكمبيوتر حته حته شغال إزاى ايه الى جوه العلبة الصفيح دى و من هنا بدأ الفضول يجينى و ابحث و أدور على الحاجات الى عاوز اعرفها كنت بأدى فى البرمجه ميح خالص قعدت و جبت كتب كويس عن السى بلس بلس و مقدرش انكر ان الكتب دى فادتنى جدا و بنيت اساسيات البرمجه كويس  و فهمتها و إستوعبتها و كل دا كان بالتدريج طبعا. 

الجزء الاول 🎬