البرمجة للمبتدئين

دائماً الحيرة بتبقى في بدايات أي حاجةجديدة عليك، بتفكر قبل ما تبدأ هتبدأ إزاي وهتبدأ منين؟ وبتفضل تسأل نفسك هل هتقدر تكمل ولا لأ؟ ومن أكتر المواضيع اللي بيبقى فيها حيرة ولخطبة في بداياتها هو علم البرمجة بكل تفاصيله الكتيرة والمتشعبة.

بدايةً، خلينا نتفق إننا بنتعلم برمجة لأهداف مختلفة تماماً عن بعض، لكننا بنبقى عاوزين نبدأ من نفس المكان ونفس الطريقة ودي أول غلطة بنعملها وإحنا بادئين نتعلم برمجة.

دلوقتى خلينا نعرف يعنى ايه برمحة؟

هتتعلم برمجة ليه؟

أول حاجة محتاج تقررها قبل ما تبدأ برمجة هو إنك هتتعلمها ليه؟ وهنا ممكن يبقى عندك إجابتين:

• التعليم من أجل التعليم والبحث

جزء من تعلم البرمجة بيبقى الغرض منه تعليمي أو بحثي، بتتعلم لغة معينة علشان تعمل بحث أو
تحلل بيانات أو علشان تتعلم مثلاً التفكير المنطقي أو طرق حل المشكلات.

• التعليم من أجل الـBusiness

الغرض التاني هو إنك تتعلم برمجة علشان تتطلع بيها منتج، سواءً المنتج ده كان موقع
أو تطبيق على موبايل، أو برنامج بيشتغل على كمبيوتر.

بعد ما تقرر إنت هتتعلم برمجة ليه هتبدأ تفكر هتتعلم إزاي وتبدأ منين؟

أبدأ إزاي؟

الإنترنت مليان بمواضيع وفيديوهات ومواقع كاملة بتشرح كل حاجة صغيرة موجودة في البرمجة
شطارتك في إنك تعرف تدور صح على الحاجة إلي إنت عايزها وزي ما قلنا في أول نقطة لو إنت
عارف بالظبط إنت عايز تتعلم ليه فهتعرف تدور على إللي إنت عايزه.
لنفرض مثلا إنك عاوز تتعلم تطوير تطبيقات للموبايل فهتبدأ تدور على Tutorials ليها علاقة بالموبايل فهتكتب مثلا Mobile Development Tutorials أو لو عايز حاجة معينة زي الـAndroid هتكتب Android Tutorials.

أبدأ منين؟

وإنت بتبدأ تذاكر برمجة محتاج تبدأ تذاكر من مواقع لازم يكون فيها شوية مواصفات أهمهم:
1- السهولة: متبدأش من موقع صعب أو بتاع محترفين، ابدأ بحاجة بسيطة وبادئة بـLevel زيرو.
2- الفيديوهات: حاول تبدأ من موقع فيه فيديوهات، هتحس إنك متفاعل أكتر مع اللي بيشرح وهتفهم أكتر.
3- الشهرة: الشهرة مش عامل مهم أوي لكنه عامل مهم ممكن تاخده في الحسبان، كل ما الموقع كان منتشر
وناس بتستخدمه كل ما كان مميز.
4- وجود Quizzes و Exercises: محتاج الموقع يبقى فيه اختبارات وحاجات عملية تجربها بعد ما تذاكر.

قواعد البرمجة

كمبرمجين وDevelopers محتاجين كل شوية نرجع لشوية قواعد تفكرنا إحنا بنعمل إيه وبنعمله ليه؟
ودي مجموعة قواعد إحنا بناخد بالنا منها

1- “البرمجة مش هي الحل”
دائما محتاجين نفتكر إن البرمجة هي الـTool أو طريقة بنحل بيها مشاكل بتواجهنا في شغلنا أو حياتنا اليومية وعمرها ما كانت هي الحل.
2- “متخترعش العجلة”
العجلة موجودة وبقالها كتير، قبلك آلاف الـDevelopers إلي جربوا وحاولوا وعدلوا.. ابني على شغلهم وابدأ من النقطة إلي انتهوا عندها، اوعى تبدأ من الصفر.
3- “التذاكي ممنوع”
حاول متبقاش ذكي زيادة على اللزوم، إن كودك يبقى واضح ومفهوم للكل أهم بكتير من إنك تفرد عضلاتك في الكود.
4- “جرب أول بأول”
اتعود دائما تعمل test كل شوية، كل ما تضيف حاجة في الكود اعمل test للـProject كله.
5- “الكومنتات”
قلة الكومنتات غلط وفي نفس الوقت زيادتها غلط.. اعمل كومنتات بالقدر الكافي إلي يخلي الناس تبقى فاهمة كودك وفي نفس الوقت ميبقاش زيادة عن اللزوم فيلخبطهم.
6- “اتعلم من أخطاء غيرك زي أخطاءك”
دور على أكواد على الإنترنت واتعلم منها واعرف المبرمجين إلي أشطر منك بيعملوا إيه وإزاي.
7- “عمرك ما هتبقى عارف كل حاجة”
عمر الـDeveloper الشاطر ما هيبقى عارف كل حاجة في الدنيا، اعرف امتى تطلب المساعدة وامتى تروح تذاكر حاجة جديدة.
8- “التدريب أهم حاجة”
المذاكرة والمراجعة عمرها ما كانت كافية علشان تخليك Developer شاطر، لو معندكش شغل اخترع حاجة واعملها!
9- “شارك الناس معاك”
حاول تخلي أكوادك Open Source على قد ما تقدر، ولو معرفتش خد رأي الناس في شكل برنامجك، خد رأيهم في الطريقة إلي اشتغلت بيها، خد رأيهم في إزاي تطوره.
10- “استمتع”
أكتر حاجة بتبسطنا هي إننا نكود فخلي بالك إن عمرك ما تفقد الإحساس ده.
إننا بنتعلم برمجة لأهداف مختلفة تماماً عن بعض، لكننا بنبقى عاوزين نبدأ من نفس المكان ونفس الطريقة ودي أول غلطة بنعملها وإحنا بادئين نتعلم برمجة.

#: هناك أجزاء مقتبسة من المقال لضمان حرية النشر.